Fredor

Dos, a cambra, silenzio. Cualcosa fizo clic ¿Se nos crebó l’amor? Sí, de tanto escribir-lo. De tanto prexinar-lo. Ixo que ébanos construito en a distanzia no se materializó. 24 oras. ¿Sinzeridá? Me cuacas, no te ¿cuaco? ¿meto? ¿no t’atraigo? Ye prou. Alargamos. Beis a tele, te relaxas, descansas. Yera o que asperabas. Yo sobro. California Sun a tot meter, me fa contenta. Te me miro, me cuacas, no bi ha feeling. Qué pincho. T’has encostipato. Yo tiengo os piez chelatos pero a capeza calién. M’encarraño. No se puede tener tot. Nadar y alzar a ropa, je. No aduermo. ¿Ormonas? ¿Alcol? ¿Desincusas? Te piras. Recullo. Me rallo. Torno ta casa y bi yes tu. Como siempre. Os tuyos güellos se fincan en as mías glarimas. M’entiendes. M’abrazas. Ixe abrazo lo siento. Me buques. Buquimos. M’estimo más no nadar. Me quedo con o que lebo meso.